Ístak hefur á undanförnum misserum unnið markvisst að því að draga úr umhverfisáhrifum starfsemi sinnar með aukinni rafvæðingu og sjálfbærari orkuskiptum. Stærsti áfanginn hingað til hefur verið rafvæðing efnisvinnslu í Stapafellsnámu þar sem starfsemin er nú rekin með 100% hreinni íslenskri raforku.
Samkvæmt fyrirtækinu markar verkefnið stórt skref í átt að kolefnissnauðari starfsemi í íslenskum byggingar- og verktakaiðnaði.
Umfangsmikil uppbygging raforkuinnviða í námunni
Mikil uppbygging hefur átt sér stað á raforkuinnviðum á svæðinu undanfarna mánuði.
Meðal þess sem hefur verið tekið í notkun eru:
- Ný 1.250 Ampera heimtaug
- Sérstakur heimtaugargámur fyrir hleðslustöð og orkudreifingu
- 200 kW DC hraðhleðslustöð fyrir vinnuvélar og dráttarbíla
Hraðhleðslustöðin þjónar meðal annars rafdrifnum hjólaskóflum og flutningabílum sem starfa við efnisvinnsluna.
Fyrsta fullrafmagnaða efnisvinnslan sinnar tegundar á Íslandi
Í maí 2026 hófst mölun steinefna með rafmagni eingöngu í samstarfi við Skútaberg.
Kónbrjótsamstæðan á svæðinu er að fullu rafdrifin og sér rafknúin LiuGong 870 hjólaskófla um efnisflutninga að og frá brjótunum.
Að sögn Ístaks er þetta í fyrsta sinn sem efnisvinnsla af þessu tagi er framkvæmd með fullrafmögnuðum hætti hér á landi, allt frá vinnslu til flutnings innan svæðisins.
Sparar tugþúsundir lítra af eldsneyti
Með rafvæðingu starfseminnar er dregið verulega úr losun gróðurhúsalofttegunda og notkun jarðefnaeldsneytis.
Áætlað er að við vinnslu um 30.000 rúmmetra af efni sparist um:
- 75.000 lítrar af jarðefnaeldsneyti
- sem samsvarar um 201 tonni af CO2-losun
Ístak segir reynsluna af rafdrifnu LiuGong 870 hjólaskóflunni hafa verið afar góða og að vélin hafi staðið undir væntingum í krefjandi aðstæðum við námuvinnslu.
Rafdrifinn dráttarbíll tekinn í notkun síðar á árinu
Fyrirtækið hyggst halda áfram rafvæðingu starfseminnar og stefnir að því að taka í notkun 100% rafdrifinn dráttarbíl með malarvagni um mitt ár 2026.
Með þeirri viðbót verður hægt að flytja efni úr námunni alfarið með endurnýjanlegri íslenskri orku og verður efnisvinnslan þá að fullu rafknúin – allt frá vinnslu til afhendingar.
Heimild: Ístak.is
