Húsið er 453 fermetrar að stærð og hefur að geyma 14 herbergi.
Þak fasteignafélag ehf., í eigu Arnars Más Jóhannessonar og Trausta Ágústssonar, hefur fest kaup á einbýlishúsi að Laufásvegi 7 í Reykjavík fyrir 445 milljónir króna.
Seljendur eru Sigríður Harðardóttir og Páll V. Bjarnason arkitekt sem keyptu húsið árið 1989 og gerðu það upp í upprunalegri mynd.
Húsið er 453 fermetrar að stærð og hefur að geyma 14 herbergi. Eignin er samtals fjórar hæðir með tveimur aðalhæðum, 150 fermetra íbúð með sérinngangi á jarðhæð og risi með tveimur kvistum og 75 fermetra gólffleti. Fasteignamat eignarinnar nemur 217 milljónum króna.
Húsið, sem var byggt árið 1918 og er hlaðið steinhús úr íslensku grágrýti, á sér mikla sögu. Þar bjó Einar Benediktsson skáld um tíma með sinni fjölskyldu. Saga hússins var rakin í frétt Morgunblaðsins í fyrra þegar eignin var auglýst til sölu á 520 milljónir króna. Eignin var síðar auglýst á 490 milljónir.
Kaupendurnir, Armar Már og Trausti, eru eigendur Trygginga og ráðgjafar ehf., stærstu vátryggingamiðlunarinnar hér á landi.
Þeir eignuðust Þak fasteignafélag á fyrri hluta ársins en fasteignafélagið var áður í eigu byggingaverktakafyrirtækisins GG Verks. Þak fasteignafélag á skrifstofurými á þriðju og fjórðu hæð Borgartúns 30.
Nálgast má myndir af Laugásvegi 7 hér.
