Vesturbæjarlaug hefur verið lokað í annað sinn á stuttum tíma. Laugin var lokuð í tvo mánuði fyrr í sumar vegna viðhalds en lokar nú óvænt aftur vegna galla á málningarvinnu.
Dyrum Vesturbæjarlaugar í Reykjavík verður lokað á ný klukkan 20 í kvöld og verður laugin lokuð í um það bil viku. Lokunin mun eflaust valda fastagestum laugarinnar vonbrigðum enda var laugin lokuð í tvo mánuði í sumar vegna viðhalds.
Sundhöll Reykjavíkur er einnig lokuð samkvæmt viðhaldsáætlun til 24. ágúst og því ljóst að gestir Vesturbæjarlaugar geta ekki leitað þangað, né geta gestir Sundhallarinnar leitað í Vesturbæ.
RÚV / Arnór Fannar Rúnarsson
Í tilkynningu Reykjavíkurborgar segir að galli á málningarvinnu sem gerð var á laugarbotninum í sumar hafi valdið því að málning er tekin að flagna af laugarkarinu. Viðgerðir hefjast strax í vikunni þar sem veðurskilyrði gera kleift að vinna verkið hratt og örugglega. Stefnt er að því að laugin opni aftur áður en skólasund hefst.
Þá segir í tilkynningunni að verktakinn sem beri ábyrgð á verkinu harmi það mjög, taki fulla ábyrgð á gallanum og muni standa straum af öllum kostnaði við úrbætur.
Heimild: Ruv.is
