Vesturbæjarlaug í Reykjavík verður lokuð fram til 15. júlí. Laugin hefur verið lokuð frá því í lok maí vegna framkvæmda, sem reyndust umfangsmeiri en áætlað var.
Vesturbæjarlaug í Reykjavík verður lokuð tæpum mánuði lengur en til stóð. Laugin hefur verið lokuð síðan í lok maí og átti að opna aftur á mánudag.
RÚV – Ragnar Visage
Í tilkynningu frá Reykjavíkurborg segir að komið hafi í ljós að þörf sé á frekari múrviðgerðum en áætlað var. Laugarkerið hafi reynst í verra ásigkomulagi en gert var ráð fyrir. Nú er stefnt á að laugin verði opnuð 15. júlí.
Fleiri framkvæmdir eru á dagskrá í Vesturbæjarlaug.
Eins og fjallað hefur verið um hafa framkvæmdir á sánaklefum laugarinnar staðið yfir og valdið tímabundnum lokunum síðustu mánuði.
Á meðan ekki er hægt að opna laugina vegna vinnu við laugarkerið er tíminn nýttur í framkvæmdir við sánaklefana, en auk þess eru framkvæmdir í afgreiðslu og verið er að setja upp nýtt neyðarkerfi í lauginni.
Heimild: Ruv.is
