F.h. Umhverfis- og skipulagssviðs Reykjavíkurborgar er óskað eftir tilboðum í eftirfarandi verk:
Seljaborg leikskóli – stakstæðar kennslustofur, útboð 16142.
Framkvæmdin felur í sér 204,4 m2 byggingu á skólastofum, tengibyggingu og lóðaframkvæmdum við leikskólann Seljaborg í Tunguseli 2. Starfsemi verður í leikskólanum á framkvæmdatíma.
Seljaborg er í dag 3 deildir með 46 börnum og starfsemin ekki rekin með annarri einingu. Starfsmannaðstaða er bágborin í núverandi ástandi og er þörf á betri aðstöðu fyrir kennara.
Með tilkomu færanlegra húsa sem staðsett verða á lóð Seljaborgar er gert ráð fyrir að starfsmannaðstaða með kaffistofu, undirbúnings- og fundaraðstöðu færist þangað. Gert er ráð fyrir að upphitaður stígur sé á milli aðalbyggingar og færanlegra stofa til að auðvelda aðgengi með mat úr eldhúsi á milli húsa.
Leikskólinn verður rekinn sem ungbarnaleikskóli og þar með áætlað að aukning verði um 20 börn. Verður þá Seljaborg 4 deilda leikskóli með 66 börnum. Gert er ráð fyrir að starfsfólk verði u.þ.b. 20 talsins.
Í öðru húsinu er gert ráð fyrir aðstöðu fyrir börnin, fatahólfum, snyrtingu, leikrýmum og listasmiðju. Í tengibyggingu verður matstofa sem einnig er fjölnota rými. Matur verður fluttur á milli frá núverandi húsi.
Í annarri skólastofunni er gert ráð fyrir starfsmannaaðstöðu fyrir skólann, með kaffistofu, undirbúningsrými og fundaraðstöðu. Stofurnar verða byggðar utan lóðar. Á meðan á byggingu þeirra stendur á að grafa lagnaskurð frá núverandi byggingu og að nýjum húsum.
Stefnt er að því að ljúka þeim hluta framkvæmdarinnar áður en komið verður með húsin. Frágangur lóðar er einnig hluti af verkinu. Endurnýja þarf þann hluta lóðarinnar þar sem nýjar stofur koma og ganga frá yfirborði.
Útboðsgögn verða eingöngu aðgengileg á útboðsvef Reykjavíkurborgar á vefslóðinni: http://utbod.reykjavik.is – frá kl. 16:00 þann 28. apríl 2025. Smellið á íslenska fánann til að fá útboðsvefinn upp á íslensku. Nýskráning fyrirtækja hefst með því að smella á „Nýskráning“.
Vakin er athygli á að senda verður fyrirspurnir í gegnum útboðsvef Reykjavíkurborgar. Fyrirspurnum sem berast með öðrum hætti verður ekki svarað.
Tilboðum skal skila með rafrænum hætti á framangreindan útboðsvef Reykjavíkurborgar eigi síðar en: Kl. 10:00, þann 27. maí 2025.
