Marek Marzec, 48 ára þriggja barna faðir, liggur fyrir dauðanum með ólæknandi lungnasjúkdóm sem hann rekur til starfa sinna síðustu árin. Hann ætlar í mál við fyrrverandi vinnuveitanda sinn vegna málsins.
New York Post greinir frá þessu.
Marek er fæddur í Póllandi en hefur frá árinu 2012 unnið í verksmiðjum í London og Hertfordshire á Englandi við að skera svokallaðar quartz-borðplötur sem njóta mikilla vinsælda meðal annars í eldhúsum og á baðherbergjum.
Marek er með það sem kallað er kísillungu (e. silicosis) en sjúkdómurinn orsakast af innöndun kísilryks. Meðal einkenna eru hósti, andnauð, þreyta, þyngdartap og óafturkræfar skemmdir á lungum.
Í frétt New York Post kemur fram að Marek sé of veikur til að gangast undir lungnaígræðslu en það er eina von hans til að lifa af.
Hann segir að ekki hafi verið passað nógu vel upp á öryggi starfsmanna í umræddum verksmiðjum. Lögfræðifyrirtækið Leigh Day fer með mál Mareks og raunar fleiri einstaklinga sem hafa þróað með sér kísillungu. Hefur fyrirtækið krafist þess að betur verði hugað að öryggi starfsmanna.
Í frétt sem New York Post birti í fyrra kemur fram að kísillungu hafi um langt skeið verið í hópi „gleymdra sjúkdóma“ en að undanförnu hafi komið upp holskefla tilfella. Talið er að í Bandaríkjunum séu um hundrað þúsund einstaklingar sem eiga í hættu á að fá sjúkdóminn.
Marzec liggur á Whittingham-sjúkrahúsinu í Lundúnum undir handleiðslu eins færasta lungnasérfræðings Bretlandseyja, Dr. Jo Feary. Vegna þess hversu langt sjúkdómurinn er kominn telja læknar að hann eigi aðeins um tvær vikur eftir ólifaðar.
Heimild: Dv.is
