Nú standa yfir framkvæmdir 1. áfanga á Geysissvæðinu með gerð göngustíga. Eru þeir hannaðir þannig að sem minnst rask verði á hverasvæðinu, með því að láta þá „svífa yfir“.
Lögð hefur verið ný leið að Strokki og liggja stígarnir að aðkomutorgi til móts við Þjónustumiðstöðina Geysi.
Verkið verður unnið í þremur áföngum og áætluð verklok allra áfanganna eru í byrjun maí 2025.
Í öðrum áfanga verður torgið byggt. Þar verða einnig settir setbekkir og brú yfir læk sem liggur fram hjá.
Útboði er ekki lokið en kostnaðaráætlun gerir ráð fyrir 120 milljónum í þann áfanga. Í 3. áfanga verður farið í framkvæmdir sem snúa að aðbúnaði ferðafólks við Strokk.
Tilboð upp á 247 milljónir
Umhverfisstofnun er framkvæmdaraðili og Framkvæmdasýslan Ríkiseignir (FSRE) er umsjónaraðili.
Landmótun sf. sá um hönnun og Wiium ehf. er verktaki 1. áfanga. Tilboð þeirra var upp á 247 milljónir, sem var aðeins undir kostnaðaráætlun.
Áætlaður kostnaður við 2. áfanga er sem fyrr segir 120 milljónir króna.
Heimild: Mbl.is
