Notkun steinullareininga frá Límtré Vírneti ehf. hefur aukist mikið undanfarin ár en þær eru helst notaðar í útveggi, milliveggi og þök. Steinullareiningarnar hafa gegnum árin sannað sig sem frábæran kost þegar kemur að hagkvæmni og góðri endingu hér á landi.
„Steinullareiningarnar eru afar einfaldar í uppsetningu,“ segir Sigurður Guðjónsson, forstöðumaður byggingardeildar Límtrés Vírnets. „Þær hafa helst verið notaðar í ýmis iðnaðarhús, verslanir, gagnaver, geymsluhús, reiðhallir, landbúnaðarbyggingar, íbúðarhús og fleiri byggingar.“
Um er að ræða íslenska gæða framleiðslu að hans sögn. „Ólíkt innfluttum steinullareiningum bjóðum við upp á stuttan afhendingartíma og uppsetning á þeim er fljótleg. Ef eitthvað skemmist eða breytist við uppsetningu þarf ekki að bíða í margar vikur eftir nýjum einingum heldur björgum við málum á stuttum tíma. Sú staðreynd að þeir sem byrja að skipta við okkur koma aftur og aftur, segir okkur að við erum að bjóða upp á afar vandaða vöru, frábæra þjónustu og samkeppnishæft verð.“
Einföld, örugg og vistvæn lausn
Hver steinullareining samanstendur af steinull, innra og ytra stáli sem límt er á steinullina segir Sigurður. „Þetta er mjög einföld og góð lausn fyrir bæði útveggi og þök því innra stálið gegnir líka hlutverki rakavarnarlags.“ Útveggir og þök sem eru byggð upp með þessum einingum þarf því ekki að loftræsta eins og hefðbundin þök, sem er mikill kostur.
Steinullin sem notuð er í steinullareiningarnar kemur að mestu leyti frá steinullarverksmiðjunni á Sauðárkróki en hún er umhverfisvænni en steinull sem er framleidd í Evrópu. „Auk þess er stálið sem notað er í framleiðslu eininganna með GreenCoat PRO BT yfirborðshúðun sem er með því umhverfisvænasta sem er á markaðnum, ásamt því að veita góða vörn gegn tæringu. Steinullareiningarnar eru framleiddar í verksmiðju okkar á Flúðum.“
Stór kostur við steinullareiningarnar að sögn Sigurðar er að þær hafa gott brunaþol og henta því vel í brunaveggi. „Með þessum einingum er einfalt og ódýrt að skipta stærri húsum upp í minni brunahólf.“
Öflug sölu- og hönnunardeild
Sölu- og hönnunardeild Límtrés Vírnets er afar öflug og aðstoðar viðskiptavini við val á réttum einingum fyrir hinar ýmsu gerðir bygginga og kemur með tillögur að hagkvæmu burðarvirki. „Deildin sér einnig um að leggja inn teikningar fyrir límtrésburðarvirki og einingar til byggingarfulltrúa. Viðskiptavinir okkar eru sérstaklega ánægðir með þessa þjónustu.“
Límtré Vírnet er rótgróið iðnfyrirtæki sem byggir starfsemi sína á margreyndum framleiðsluferlum og hefur þjónað byggingarmarkaði hérlendis með gæðavörum í rúmlega 60 ár. Fyrirtækið er sem dæmi eini framleiðandi límtrés og steinullareininga hér á landi en framleiðsla þess fer fram í verksmiðjum fyrirtækisins á Flúðum.
Heimild: Visir.is
