Fyrsti samningurinn um uppbyggingu á hafnarsvæðinu samþykktur í bæjarstjórn Hafnarfjarðar.
Samningur um uppbyggingu á blandaðri byggð 144 íbúða við Hvaleyrarbraut 26-30 í Hafnarfirði var samþykktur samhljóða í bæjarstjórn Hafnarfjarðar, miðvikudaginn 19. júní.
Hafnarfjarðarbær hefur lagt áherslu á að þétta byggð á ákveðnum svæðum og er nú að hefjast uppbygging á þéttingarreit norðan Hvaleyrarbrautar. Uppbyggingin tengist metnaðarfullri uppbyggingu bæjarins á Flensborgarhöfn og Óseyrarsvæði.
„Það er mjög ánægjulegt að fyrsti samningurinn um uppbyggingu á hafnarsvæðinu sé nú í höfn. Áform um íbúðabyggð þar hafa verið í undirbúningi um nokkurt skeið og því er þessi samningur stórt skref,“ segir Rósa Guðbjartsdóttir, bæjarstjóri Hafnarfjarðar.
„Bæjarstjórn Hafnarfjarðar er einhuga um áframhaldandi uppbyggingu í bæjarfélaginu og leggjum við áherslu á fjölbreyttar íbúðir á ólíkum svæðum bæjarins. Hafnarsvæðið er mjög spennandi valkostur og lykilsvæði í Hafnarfirði í þéttingu byggðar. Þessi samningur markar ákveðið upphaf í uppbyggingu á svæðinu og gefur tóninn fyrir það sem koma skal.“
Ný blönduð byggð með íbúðum og þjónustustarfsemi
Hafnarfjarðarbær horfir nú til fleiri svæða í sveitarfélaginu í því skyni að byggja upp blandaða byggð með íbúðum og þjónustustarfsemi. Það er gert í kjölfar samþykktar á nýju svæðisskipulagi höfuðborgarsvæðisins, Höfuðborgarsvæðið 2040. Á meðal þeirra eru svæði við Hafnarfjarðarhöfn og í nágrenni hennar sem hafa hingað til verið ætluð undir atvinnustarfsemi.
Hvaleyrarbraut 26-30 er eitt þessara svæða og nú hefur Hafnarfjarðarbær samið annars vegar við Fjarðarmót um uppbyggingu á lóð nr. 26. Hins vegar við Hagtak hf. og Verkfræðiþjónustu Jóhanns G. Bergþórssonar ehf. um uppbyggingu á lóðunum nr. 28 og 30.
Heimilt er að byggja fjölbýlishús með að hámarki 45 íbúðum á lóðinni Hvaleyrarbraut 26. Á lóð nr. 28 má byggja fjölbýlishús með að hámarki 41 íbúð og á lóð nr. 30 fjölbýlishús með að hámarki 58 íbúðum. Í heild 144 íbúðir.
Gert er ráð fyrir húsnæði undir verslunar- og þjónustustarfsemi á öllum lóðunum auk þess sem Hafnarfjarðarbær hefur áskilið sér rétt til að kaupa tvær íbúðir í hverju fjölbýlishúsi, eða sex íbúðir í heild.
Iðnaðarbyggingar víkja fyrir breyttri starfsemi með auknu þjónustustigi
Bæjarstjórn samþykkti breytingu á aðalskipulagi bæjarins 2013-2025 þann 31. ágúst 2022 og Skipulagsstofnun staðfesti þær 13. janúar 2023.
Aðalskipulagsbreytingin nær til landsvæðis lóðanna Hvaleyrarbrautar 20-32 og tekur til þess að iðnaðarbyggingar víki fyrir breyttri starfsemi með auknu þjónustustigi á lóðum, í samráði við lóðarhafa. Einnig að á svæðinu verði miðsvæðisstarfsemi með áherslu á verslun og þjónustu og heimild fyrir íbúðir á efri hæðum.
Samspil hafnar og bæjar
Uppbyggingin á hafnarsvæðinu í heild sinni mun, samkvæmt samþykktu rammaskipulagi, styrkja samspil hafnar og bæjar með áherslu á mótun strandlengjunnar, bættum samgöngum og tengingum að miðbæ og þéttingu byggðar við höfnina.
Almenningsrými verður límið í skipulagi hafnarsvæðisins á milli mismunandi þróunarreita og myndar samfellda byggð. Gert er ráð fyrir almenningssvæði í háum gæðaflokki, fjölbreyttri atvinnu og íbúðum í nánum tengslum við það ásamt afþreyingu. Þannig laðar höfnin að sér öflugt mannlíf og betri upplifun.
Heimild: Hafnarfjörður
