Samningur vegna byggingu á nýrri fjölnota farþegamiðstöð Faxaflóahafna á Skarfabakka var undirritaður í Hafnarhúsinu síðastliðinn föstudag.
Eru það ÍAV og samstarfsaðilar, verkfræðistofan VSÓ og BROKKR STUDIO arkitektar, sem sjá um hönnun og byggingu miðstöðvarinnar.
Undirbúningur verks er þegar hafinn og verklegar framkvæmdir hefjast í marsmánuði. Áætlað er að farþegamiðstöðin verði fullkláruð fyrir vertíð skemmtiferðaskipa vorið 2026.
Farþegamiðstöðin mun gerbylta allri aðstöðu og þjónustu við farþega skemmtiferðaskipa sem koma á Skarfabakka. Aðstöðunni er ætlað að þjóna farþegum skemmtiferðaskipa hvort sem þeir hefja eða ljúka sinni ferð á Íslandi sem og þeim sem eingöngu eru í dagsheimsókn.
Hönnun hússins gerir ráð fyrir að hægt sé að nýta það undir viðburði af ýmsu tagi á þeim tíma ársins þegar skemmtiferðaskip eru ekki á ferðinni til landsins.
Heimild: Faxafloahafnir.is
