„Maður verður taka einhvern tíma í að melta það sem hefur gerst á þessum stutta tíma,“ segir Benedikt Sigurðsson sem fylgdist með í beinni útsendingu þegar sprunga opnaðist við bæjarmörk Grindavíkur. „Gosinu er lokið en þessu er engan veginn lokið.“
„Við erum að eiga við jörðina sjálfa og hreyfingar hennar sem enginn stjórnar nema hún sjálf,“ sagði Fannar Jónasson, bæjarstjóri í Grindavík á tilfinningaþrungnum íbúafundi í gær. En hvernig er að koma til Grindavíkur eftir atburði síðustu daga?
Benedikt Sigurðsson, fréttamaður, var í hópi þeirra fjölmiðlamanna sem fékk að fara til bæjarfélagsins stuttu eftir að gosi lauk rétt við bæinn. Hann lýsir upplifun sinni í hlaðvarpsþættinum Sjö mínútur með fréttastofu RÚV. „Maður áttaði sig þá á því af hverju það er svona hættulegt að vera í bænum,“ lýsir Benedikt.
Hann segir þá hugsun hafa leitað á sig þegar hann stóð á malbiki og skoðaði sprungu í bænum með björgunarsveitarmönnum hvort það væri hugsanlegt að þarna væri eitthvað holrými undir, ekki síst eftir það sem gerðist í síðustu viku. „Það gerði vistina í Grindavík svolítið undarlega.“
Benedikt telur að Grindvíkingar standi ekki frammi fyrir þeirri spurningu hvort þá langi aftur heim heldur hvort það sé óhætt. „Fólk sem ég talaði við var ekki á þeim buxunum og af augljósum ástæðum. Er til að mynda óhætt að vera með börn í Grindavík? Ef nei, þá er svarið við þeirri spurningu hvort þú ætlir aftur til Grindavíkur augljóst.“
Heimild: Ruv.is
