Undirritaður hefur verið samningur milli Mýrdalshrepps, innviðaráðuneytis og Húsnæðis- og mannvirkjastofnunar um aukið framboð íbúðarhúsnæðis í Mýrdalshreppi á tímabilinu 2023-2032 og fjármögnun uppbyggingar hagkvæma íbúða og félagslegs húsnæðis.
„Samkomulagið markar tímamót fyrir Mýrdalshrepp og styður við markmið sveitarfélagsins um heilbrigðan húsnæðismarkað fyrir ört fjölgandi hóp íbúa. Mýrdalshreppur verður annað sveitarfélagið á landinu til þess að marka skýra stefnu um aukið framboð íbúðarhúsnæðis á grundvelli rammasamnings ríkis og sveitarfélaga.
Aukið framboð íbúða er lykilatriði í því að styðja við sjálfbæra byggðaþróun og samvinna ríkis og sveitarfélagsins er mikilvægur liður í áframhaldandi uppbyggingaráformum Mýrdalshrepps,“ segir Einar Freyr Elínarson, sveitarstjóri Mýrdalshrepps.
Samningurinn byggir á rammasamningi ríkis og sveitarfélaga þar sem sameinast var um sýn og stefnu í húsnæðismálum til að tryggja uppbyggingu íbúða í samræmi við þörf. Meginmarkmið rammasamningsins eru þau að byggðar verði um 35 þúsund íbúðir á 10 árum og um 4 þúsund íbúðir á ári á fyrri hluta samningstímans.
Í samningnum við Mýrdalshrepp kemur fram það markmið að byggðar verði 200 nýjar íbúðir á næstu 10 árum með áherslu á kröftuga uppbygginu á fyrri hluta tímabils. Stefnt verði að því að byggja allt að 94 íbúðir á ári á næstu fimm árum og er það tvöföldun miðað við það sem fyrri áætlanir gerðu ráð fyrir.
Þær íbúðir sem þarna falla undir eru íbúðir byggðar á grundvelli stofnframlaga, húsnæði fyrir stúdenta, tiltekna hópa eldri borgara og öryrkja sem og íbúðir sem byggðar eru fyrir ungt fólk og fyrstu kaupendur og falla undir hlutdeildarlán.
Heimild: Sunnlenska.is
