Héraðssaksóknari hefur ákært fertugan karlmann fyrir meiriháttar brot gegn skattalögum í rekstri einkahlutafélags. Þetta er í annað sinn á tveimur árum sem maðurinn er ákærður fyrir skattalagabrot.
Fertugur karlmaður hefur verið ákærður fyrir að standa ekki skil á virðisaukaskatti upp á 23,5 milljónir og staðgreiðslu opinberra gjalda upp á tæpar 20 milljónir í rekstri verktakafyrirtækis í Kópavogi. Málið verður þingfest í Héraðsdómi Reykjaness í næstu viku.
Í ákærunni krefst héraðssaksóknari þess jafnframt að manninum verði bannað að stofna fyrirtæki eða koma með öðrum hætti að stjórnun félags í þrjú ár.
Þetta er í annað sinn á skömmum tíma sem maðurinn er ákærður fyrir skattalagabrot í rekstri verktakafyrirtækis.
Fyrir tveimur árum var hann ákærður fyrir meiriháttar brot gegn skattalögum. Hann játaði sök fyrir dómi í fyrra eftir að kröfu hans um frávísun var hafnað. Hann var í framhaldinu dæmdur í fimm mánaða skilorðsbundið fangelsi og gert að greiða rúmar tólf milljónir í sekt.
Heimild: Ruv.is
