Ný Þjórsárbrú við Árnes gæti farið í útboð í haust

„Þó þessi vegur tengist framkvæmdum Landsvirkjunar á svæðinu þá verður það Vegagerðin sem kemur til með að bjóða verkið út og hafa með því umsjón,“ segir Einar Már Magnússon, verkefnastjóri á framkvæmdadeild Vegagerðarinnar.

Brúin verður rúmlega tvöhundruð metra löng og byggð skammt ofan við fossinn Búða. Til að tengja hana við þjóðvegakerfið verður lagður 7,4 kílómetra langur vegur, sem kemur til með að heita „Búðafossvegur“. Norðanmegin tengist hann Þjórsárdalsvegi skammt vestan við félagsheimilið Árnes og sunnanmegin tengist hann við Landveg skammt frá bænum Minni-Völlum.

„Við reiknum með að bjóða út vegagerðina og brúarsmíðina í einu útboði sem verður sennilega haustið eða veturinn 2023,“ segir Einar Már.

Vegagerðin vonast til að hönnun brúarinnar ljúki núna í maímánuði og eru meðfylgjandi teikningar birtar með fyrirvara um að þær gætu breyst, til dæmis við athuganir á straumhraða og byggingaraðferð. Vegagerðin stefnir þó að því að sækja um framkvæmdaleyfi í sumar þegar endanleg gögn eru tilbúin og búið að yfirfara þau, að sögn Einars Más.

Landsvirkjun fékk virkjunarleyfi fyrir Hvammsvirkjun frá Orkustofnun í nóvember og sótti í framhaldinu um framkvæmdaleyfi til viðkomandi sveitarstjórna, Rangárþings ytra og Skeiða- og Gnúpverjahrepps. Ráðamenn beggja sveitarfélaga hafa gefið það út að stefnt sé að ákvörðun um framkvæmdaleyfi núna í maímánuði.

Það hefur lengi verið draumur Sunnlendinga að fá brú yfir Þjórsá á móts við þorpið Árnes. Með slíkri brú yrði aðeins sjö kílómetra leið fyrir íbúana þar til að heilsa upp á næstu nágranna sína handan ár í Rangárvallasýslu, í stað þess að aka sextíu kílómetra leið. Brúin gæti þannig haft mikla þýðingu fyrir samgöngur og ferðaþjónustu í uppsveitum Suðurlands.

Heimild: Visir.is