Borgarráð samþykkti í gær kaup á sextán færanlegum kennslustofum fyrir Hagaskóla auk samtengdra ganga og salerna fyrir rúmar 850 milljónir króna.
Til viðbótar við þann kostnað er gert ráð fyrir að við bætist um 80 milljónir króna vegna jarðvinnu, undirstöðum og lögum í jörðu, að því er fram kemur í bréfi fjármála- og áhættustýringarsviðs til borgarráðs.
„Með þessu móti verður hægt að færa alla nemendur skólans úr bráðabirgða úrræðum í Ármúla 28-30 og Korpuskóla á lóð Hagaskóla. Áætlað er að hægt verði að taka fyrstu stofurnar í notkun í lok mars 2023,“ segir jafnframt í bréfinu.
Nemendur á vergangi
Greint hefur verið frá sögu Hagaskóla en nemendur á fyrstu tveimur unglingastigum skólans, um það bil 400 nemendur, hafa verið á vergangi frá því í lok síðasta árs þegar mygla greindist í húsnæði skólans.
Til að byrja með leigði borgin Hótel Sögu undir nemendur og skrifstofuhúsnæði í Ármúla.
Fréttablaðið greindi frá því undir lok síðasta árs að leiga á húsnæði Hótel sögu hafi kostað Reykjavíkurborgar um 3,4 milljónir með virðisaukaskatti frá 19. nóvember til 21. desember.
Athugasemdir slökkviliðs
Í upphafi þessa skólaárs var kennsla árganganna tveggja færð á sama stað í Ármúla en þar með er ekki öll sagan sögð. Snemma gerði slökkvilið höfuðborgarsvæðisins alvarlegar athugasemdir um skort á brunavörnum húsnæði skólans í Ármúla. Í kjölfarið var ákveðið að flytja hluta nemenda tímabundið upp í Korpuskóla í Grafarvogi.
Formaður foreldrafélags Hagaskóla sagði í samtali við Fréttablaðið í lok september að foreldrum væri stórkostlega misboðið vegna stöðunnar.
Nú er gert ráð fyrir að nemendur snúi aftur heim en þó ekki fyrr en í fyrsta lagi í lok mars á næsta ári. Í bréfinu til borgarráðs kemur ekki fram um framkvæmdir á mygluðu húsnæði Hagaskóla.
Heimil: Frettabladid.is
