Borgarráð Reykjavíkurborgar hefur samþykkt að leggja 130 milljónir króna í uppbyggingu á viðburðasvæðinu í Hljómskálagarðinum í Reykjavík. Skuli það gert til að garðurinn verði betur í stakk búinn til að taka á móti mannfjölda á stórum hátíðisdögum á borð við þjóðhátíðardaginn og Menningarnótt.
Í tilkynningu frá Reykjavíkurborg segir að áætlað sé að framkvæmdir hefjist í haust og að þeim verði lokið í júní 2023, en verkið verður áfangaskipt.
„Þessi tillaga var sérstaklega kynnt í íbúaráði Miðborgar og Hlíða í mars síðastliðnum og fór enn fremur fyrir umhverfis- og heilbrigðisráð Reykjavíkurborgar í apríl.
Hvað verður gert á viðburðarsvæði?
- Í garðinum verður útbúin álagsþolin viðburðarflöt.
- Skipt verður um jarðveg á svæðinu og lagðar drenlagnir undir grassvæði.
- Við grasflötina verður gert nokkuð stórt upphækkað og undirbyggt svæði fyrir svið.
- Akstursleið fyrir þjónustubíla inn á svæðið verður styrkt.
- Gróður verður grisjaður og beð stækkuð.
- Sett verður upp lýsing á svæðinu.
- Aðstaða fyrir matarvagna verður á aðliggjandi svæði.
REYKJAVÍKURBORG
Ennfremur segir að framkvæmdasvæðið verði lokað af á meðan framkvæmdum stendur. Ekki sé gert ráð fyrir að framkvæmdin hafi teljandi áhrif á umferð um garðinn eða nágrenni hans. Leiðin af brúnni yfir Hringbraut inn í garðinn verði lokuð tímabundið en á meðan verði umferð beint um hjáleið.
Heimild: Visir.is
