Útboðsferli og efnisinnflutningur veldur töfum
Útboðsferli viðbyggingarinnar á Akureyrarflugvelli tók lengri tíma en reiknað var með, auk þess sem efnisinnflutningur hefur tafist. Enn er ekki er vitað hvenær stál og efni í burðarvirki hússins kemur til landsins.
„Það verður bara að segjast eins og er að það er óvissa í öllum heiminum varðandi aðföng á stáli og burðarverki og við höfum ekki fengið endanlega dagsetningu frá verktakanum hvenær við eigum von á því til landsins,“ segir Sigrún Björk Jakobsdóttir, framkvæmdastjóri Isavia innanlandsflugvalla.
Hún er engu að síður vongóð um að áætluð verklok standist, sem eru síðsumars 2023.
Bráðabirgðalausn tilbúin í lok júní
Umferð um Akureyrarflugvöll hefur aukist mikið með auknu millilandaflugi og búist er við því að enn bæti í. Sigrún segir nauðsynlegt að bregðast við þessu á meðan viðbyggingin er ekki tilbúin.
„Við erum að setja upp bráðbirgðarlausn í suðurenda flugstöðvarinnar sem þjónar innalandsfarþegunum, bæta í biðsalinn þar og búa til annað hlið sem hægt væri að ganga út á brautina í innanlandsflugi,“ segir Sigrún. Hún reiknar með að þessi framkvæmd verði tilbúin í júnílok.
Heimild: Ruv.is
