Fresta hefur þurft endurbótum á gólfi Lagarfljótsbrúar um mánaðarskeið sökum mistaka í afhendingu á þeim stálmottum sem notaðar eru á brúargólfið.
Verkinu, sem staðið hefur yfir frá nóvember og átti að ljúka í lok febrúar, er enn ekki lokið en það er sérstakur brúarvinnuflokkur Vegagerðarinnar sem séð hefur um vinnuna.
Verkinu var ekki hægt að ljúka á réttum tíma þar sem röng stærð af stálmottum þeim er settar eru yfir timburgólf brúarinnar voru afhentar.
Von er á réttum plötum strax í byrjun aprílmánaðar og verður verkinu framhaldið og lokið í kjölfarið að sögn upplýsingafulltrúa Vegagerðarinnar.
Mottuvandræðin reyndust þó ekki alfarið slæm þegar allt kom til alls því sökum tafanna hefur brúarflokkurinn náð að lagfæra fimm aðrar smærri brýr á svæðinu hingað til.
Heimild: Austurfrett.is
