Framkvæmdum við nýja veg yfir Dynjandisheiði mun ljúka árið 2024 samkvæmt samþykkt Alþingis frá 29. júní 2020 um samgönguáætlun fyrir árin 2020-2024.
Áætlunin var endurskoðun nú í síðasta mánuði en er óbreytt hvað varðar Dynjandisheiði.
| Dynjandisheiði 35,2 km kostn. 5.800 m.kr. 1.1. 2020 | ||||
| Ár | Fjárveiting | |||
| 2020 | 550 | |||
| 2021 | 1.050 | |||
| 2022 | 800 | |||
| 2023 | 1.400 | |||
| 2024 | 1.800 |
Fjárveitingarnar voru 550 m..kr í fyrra og 1.050 m.kr á þessu ári. Á næsta ári eru aðeins 800 m.kr. til framkvæmdanna. Athyglisvert er að 3.200 m.kr af 5.800 m.kr. kostnaði eru á tveimur síðustu árunum. Það hefur í för með sér að þunginn af framkvæmdunum verður að falla á tvö síðustu árin af þessum fimm.
Samkvæmt upplýsingum Bæjarins besta voru uppi hugmyndir hjá Vegagerðinni að auka framkvæmaþungann á þessu og næsta ári á Dynjandisheiðinni með því að færa fjárveitingar af öðrum verkum á landinu sem vinnast hægar en samþykkt var og endurgreiða það svo 2023 og 2024.
Með því móti tækist að flýta vegagerðinni á Dynjandisheiðinni. Horfið hefur verið frá þessum áformum m.a. vegna þess að ákveðið var að setja 2 milljarða króna af nýbyggingarfé í viðhald vega víða um land.
Þó verður á þessu ári bætt við útboðsverkið upp Pennudalinn og nýbygging vegarins mun ná að vegamótunum til Bíldudals.
Næsti kafli verksins verður boðinn út á næsta ári og hefst vinna við hann þá eins og samþykkt samgönguáætlun gerir í raun ráð fyrir.
Segja má að viðhaldsþörfin hafi verið tekin fram yfir flýtingu á Dynjandisheiði. Þessi ákvörðum hefur formlega verið tekin af yfirstjórn Vegagerðarinnar en telja má víst að hún hefur verið borin undir ráðherra málaflokksins.
Heimild: BB.is
