Tilboð í þakviðgerðir Brekkubæjarskóla og Bjarnalaugar á Akranesi voru opnuð á fundi skipulags- og umhverfisráðs á mánudag.
Átti GS Import ehf. lægsta boð í bæði verkin. Fyrirtækið bauð rétt tæpar 5,6 milljónir í viðgerð á þaki Bjarnalaugar en kostnaðaráætlun hljóðaði upp á 6.582 þús. kr.
GS Import bauð tæpar 15,6 milljónir í viðgerð á þaki Brekkubæjarskóla, en kostnaðaráætlun hljóðaði upp á tæpar 18,6 milljónir.
Trésmiðjan Akur ehf. bauð tæpa 6,1 milljón í þakviðgerð Bjarnalaugar en SF smiðir ehf. buðu tæpar 7,6 milljónir. Akur bauð tæpar 18,6 milljónir í viðgerð á þaki Brekkubæjarskóla en SF smiðir buðu tæpa rúmlega 21,8 milljónir í það verk.
Sviðsstjóra var falið að ganga til samninga við lægstbjóðanda, GS Import, um verkin.
Heimild: Skessuhorn.is
