Félagsmálaráðherra vill auka stofnframlögum til að fjölga byggingu leiguíbúða úr 300 í 600 árið 2020.
Ásmundur Einar Daðason, félags- og barnamálaráðherra, hefur samkvæmt nýju fjárlagafrumvarpi óskað eftir því að fjárframlög til stofnframlaga til byggingar eða kaupa almennra íbúða verði 3,7 milljarðar króna á næsta ári.
Þetta kemur fram á vef stjórnarráðsins þar sem segir að áður hafi verið ráðgert að dregið yrði úr fjölgun leiguíbúða í almenna íbúðakerfinu.
Upphaflega hafi átt að reisa 300 slíkar íbúðir á næsta ári en nú standi til að tvöfalda fjöldann og byggja 600 íbúðir með slíkum stofnframlögum.
Aukningin er sögð hluti af umsömdu framlagi til lífskjarasamninganna frá því í vor.
„Ég hef lagt mikla áherslu á að húsnæðismál séu velferðarmál og því verður mjög ánægjulegt að fylgja þessari uppbyggingu eftir.
Þetta er auk þess einn af þeim þáttum sem lagt var upp með í tengslum við lífskjarasamninga á vinnumarkaði og það er ánægjulegt að þeir séu nú byrjaðir að skila sér í aðgerðum,” er haft eftir Ásmundi Einari Daðasyni, félags- og barnamálaráðherra í fréttinni á vef Stjórnarráðsins.
Heimild: Vb.is
