Innkaupaferli Ríkiskaupa og Reykjanesbæjar, vegna verkhönnunar og verkframkvæmdar við byggingu Stapaskóla í Dalshverfi í Reykjanesbæ hefur verið stöðvað um stundarsakir, eftir ákvörðun kærunefndar útboðsmála. Lægstbjóðandi í verkefnið, verktakafyrirtækið Munck krafðist þess að kærunefnd útboðsmála stöðvaði „ferli samkeppnisviðræðna“ með kæru til nefndarinnar.
Þá krafðist fyrirtækið þess að nefndin felli úr gildi ákvarðanir Reykjanesbæjar um „höfnun tilboðs sem og ákvörðun um að hefja ferli samkeppnisviðræðna.“ Jafnframt var óskað álits kærunefndar útboðsmála á skaðabótaskyldu varnaraðila, en kærunefndin tók þann þátt kærunnar ekki fyrir og bíður úrlausn málsins að því leyti endanlegs úrskurðar.
Samkvæmt upplýsingum frá Umhverfis- og skipulagssviði Reykjanesbæjar kemur þessi niðurstaða til með að tefja framkvæmdir við byggingu skólans, en ekki liggur enn fyrir hversu miklar tafirnar verða.
Kennsla fer fram í Stapaskóla, en kennt er í bráðabirgðarhúsnæði. Unnið er að stækkun þess fyrir næsta skólaár.
Heimild: Suðurnes.net
