Almenna leigufélagið hefur fjárfest í þremur fasteignum í miðborg Reykjavíkur, sem telja samtals 54 hótelíbúðir. Um er að ræða fasteignirnar Lindargötu 34-36, Vatnsstíg 11 og Barónsstíg 28.
Að auki keypti félagið fasteignina að Laugavegi 56, þar sem til stendur að byggja við núverandi hús. Að framkvæmdunum loknum, um mitt ár 2019, verða sextán hótelíbúðir á Laugavegi 56 auk veitingastaðar á jarðhæð. Með í kaupunum fylgdi rekstrarfélagið Reykjavik Apartments, sem hefur annast rekstur hótelíbúðanna undanfarin misseri undir heitinu Swan House. Kaupin eru háð samþykki samkeppnisyfirvalda.
Með kaupunum, og eftir stækkun á Laugavegi 56, mun fasteignasafn Almenna leigufélagsins stækka um 3.157 fermetra. Heildarkaupverð fasteignanna og rekstursins, að framkvæmdakostnaði á Laugavegi meðtöldum, er 2,6 milljarðar króna. Kaupin munu leiða til þess að áætlaður rekstrarhagnaður (EBITDA) Almenna leigufélagsins hækkar um 190-220 milljónir kr. á ársgrundvelli.
Almenna leigufélagið á og rekur rúmlega tólfhundruð íbúðir. Íbúðirnar eru langflestar í langtímaleigu til einstaklinga, en 42 íbúðir eru nýttar í skammtímaleigu til ferðamanna. Eftir kaupin verða skammtímaleiguíbúðir félagsins því 112 talsins.
María Björk Einarsdóttir, framkvæmdastjóri Almenna leigufélagsins segir félagið ánægt með þessa viðbót í fréttatilkynningu. „Almenna leigufélagið hefur allt frá stofnun lagt áherslu á að fjárfesta í miðborg Reykjavíkur og með kaupunum á Reykjavik Apartments styrkjum við enn frekar stöðu okkar á eftirsóknarverðustu svæðum höfuðborgarinnar,“ segir María Björk.
„Við erum auðvitað fyrst og fremst langtímaleigufélag en með því að auka hlutdeild í fasteignum sem leigðar eru ferðamönnum náum við fram aukinni áhættudreifingu í safnið og verjum okkur gegn sveiflum í hagkerfinu. Hótelíbúðir eru sérstaklega hentug fjárfesting fyrir okkur því einfalt er að nýta þær til langtímabúsetu ef breytingar verða á markaði fyrir ferðaþjónustu.“
Heimild: Vb.is
