Vesturhús höfuðstöðva OR er illa farið af rakaskemmdum og mjög dýrt að gera við það. Málið var rætt á stjórnarfundi OR, þar sem ýmsum möguleikum var velt upp. Ákvörðun um aðgerðir liggur ekki fyrir.
Raki og mygla uppgötvast
Í september árið 2015 urðu starfsmenn OR varir við rakaskemmdir á innanverðum útveggjum vesturhússins við Bæjarháls. Mat á eðli og umfangi skemmdanna leiddi í ljós að skemmdir eru ekki bundnar við ákveðin svæði í húsinu heldur eru allir útveggir skemmdir. Önnur hús OR á lóðinni eru í ágætu ástandi. Þau eru öll byggð með öðrum hætti en vesturhúsið.
Vesturhúsið stendur autt. Tilraunaviðgerð hófst um mitt ár 2016 og nemur áfallinn kostnaður vegna skemmdanna 460 milljónum króna. Í júnímánuði síðastliðnum lá fyrir mat á árangri tilrauna til viðgerða og síðan hafa valkostir um framhaldið verið kannaðir.
Valkostirnir
Sex leiðir hafa verið skoðaðar til lausnar sem skipta má í lagfæringu eða endurbyggingu útveggja, að klæða húsið hlífðarkápu eða rífa það að hluta.
| Valkostur |
Áætlaður kostnaður í mkr. |
Áætlaður líftími (ár) |
Verktími (mánuðir) |
| Regnkápa |
1.740 |
50 |
18 |
| Lagfæring veggja |
1.500 |
15 |
24 |
| Nýir veggir-álgluggakerfi |
2.880 |
50 |
33 |
| Nýir veggir-stál og timbur |
2.380 |
50 |
33 |
| Rífa húsið og byggja nýtt minna hús á grunni þess gamla |
3.020 |
+50 |
42 |
| Rífa húsið og starfsemi flutt í önnur hús á lóðinni |
2.150 |
+50 |
18 |
| Áætlanir um kostnað við þessar leiðir eru mislangt komnar en eins og taflan ber með sér eru allir kostir mjög dýrir. Fjárhæðirnar eru án áfallins kostnaðar. | |||
OR hefur farið þess á leit við Héraðsdóm Reykjavíkur að dómkvaddur matsmaður verði fenginn til að meta ástæður skemmdanna og tjónið af þeim. Niðurstaðan verður grunnur að því að meta lagalega stöðu OR en í varúðarskyni reiknar fyrirtækið ekki með bótum í kostnaðaráætlunum.
Bjarni Bjarnason, forstjóri OR:
Þetta eru vond tíðindi. Við verðum þó að takast á við þann veruleika sem við okkur blasir. Okkur liggur ekki á að ákveða okkur og getum þess vegna gefið okkur tíma í gott samtal um hvernig er best að ráða fram úr stöðunni. Vesturhúsið stendur autt í dag og það truflar ekki grunnþjónustu við viðskiptavini.
Greinargerð um ástand á vesturhúsi og leiðir til úrbóta
Kynning á blaðamannafundi – vesturhús OR
Heimild: Orkuveitan
